بحبك سوريتي:محكية للشاعرة السورية فهيمة يوسف

.....بحبك سوريتي......
............................
من  خوفن  ع  صحتنا
غلّوا   الدخّان
الله    يديم   حكومتنا
كلّن  شجعان
....... .........
أشكر  فضلن  يا  قلبي
قصدن يحموك
من   علّة  او  من نكبة
فيها   يسمّوك
كنّا    نجلب    بالجلبة
كروزين  ملوك
صرنا   نحلم    بالعلبة
حقّا   ألفان
..................
كنًا  نشرب و نضيّيف
من دوم هموم
وكنّا نرحل  ونصيّيف
فوق الغيوم
صرنا  منقول مكيّيف
صار المرحوم
و  لأنو  كان   رهيّيف
قتلو  الحرمان
..................
باللحمة  ما  رح  نحلم
حتي  بالحلم
من السمنة زيتك اسلم
لو فيك تشم
بحالتنا    الله     اعلم
كل ليلة فلم
والشعب الصابر أقسم
يحمي البلدان
.................
كنّا    منحب    الليرة
وتكون  الحل
و  نقول   يكتّر  خيرا
هالست الكل
و   لمّا   حبّينا    غيرا
الإحساس انشل
صارت رعب التسعيرة
بقلب الدكّان
.................
بيقولوا صلّي وصومي
هيك المطلوب
وزكّي من شان تدومي
من غير ذنوب
ليش فطوري مبرومة؟
ورز المقلوب؟
دايم  بتعشى همومي
وفطر أحزان
.................
يا حكومتنا  الميمونة
حسّي  بالشعب
عايش ما عندو مونة
ومجهول الدرب
و   التجّار  المجنونة
الماعندن قلب
و همّن  زادوا ديوني
ضاع  الوجدان
.................
حتى  بعهد  الكورونا
زادت الحمال
وزايد ضغط الخانونا
بكل الاحوال
يا    إخواتي   خلّونا
نذلّ  الأموال
هي أموال  الكرهونا
من الأمريكان
.................
من بعدا جايي قيصر
يعمل مشوار
علينا  اتكبّر  و  اتجبّر
متل الإعصار
لو  إنو   شاطر   فكّر
إنو   الدّولار
عنلة  بتزول  و يذكر
بس الإنسان
................
يااا تاجر  بكرا  بتندم
إقرا  التاريخ
للظالم مش رح يرحم
لو مهما يشيخ
ناسك  بيكفي  تحرم
ما هم  بطّيخ
لا  تدبح  حتى تسلم
قول القرآن
................
سورية  ما رح  عوفك
لو مهما صار
متل النجمةعم شوفك
يا أوفى دار
دمتي تهلّي بضيوفك
لو جارك جار
ودوم تصدّي بسيوفك
غدر العدوان
.................
ما  بنساكي  يا  بلادي 
تتروح الروح
روحي بإسمك بتنادي
وقلبي مجروح
اهديتك عمري واولاد
وعطر المسفوح
من قبلي ضحّوا اجدادي
ودمّن  بركان
..............................