رثاء الامل:محكية للشاعرة السورية فهيمة يوسف

..................رثاء الأمل.......................
...............................................
 قضيت عمري ناطرة كلمة غزل
........ضاع العمر و اللون بالشعر انبدل
و الفكر يبرم كيف ما دار الهوى
......و لقلب أعمى و شايف بعينو الأمل

أعمى و غبي بيشوف حالو بالوفا
........متل الفراش يحوم و يحب الدفا
قضى العمر سهران محروم الغفا
........متل النحل تعبان  و يقدم  عسل

ظن العسل بيفيد و يقوي القلب
.... تاري العسل بيضر و يصيب العصب
مسكين قلبي ضايع و ضاع التعب
......وعاش الهوان ولا عرف معنى الملل

و بيعيش بالآمال و الحلم النقي
.......فارد جناحو  و  بالمشاعر   مرتقي
بس القلب غلطان مجنون و شقي
......حساس و الاحساس بيجيب العلل

قلبي عليل و داير يداوي البشر
......ويهدي الفرح للناس و يعيش القهر
و يبني أماني و الأماني تنكسر
......متل القصور الشامخه فوق  الرمل

ليش  الغدر  يا  رمل  يا  انسان
.....وليش الكذب  قلت  الزمن  خوّان
مين الزمن ؟ فينا الزمن خلقان
......من  يوم  آدم قال ما كلت و أكل

و فكرت  قلّو للقلب عوف الغرام
....وعيش بسعادة مزيفه بزيف الكلام
قلي عجيبة كيف قلتيلي حرام
....قتل المشاعر و تطلبي مني القتل؟

حاولت اقنع قلب بالحب انكوى
..... ينسى المحبة يوم تا  نكمّل  سوى
داب القلب و الحب للقلب الدوا
..... يا ريت جسمي مات مستنّى الوفا
...ولا مات قلبي و مات بالقلب الأمل...
.................................................