زوجة شهيد:محكية للشاعر السوري ابو لطفي وسوف
.. زوجة شهيد ..
وقفت بباب الدار محتاره
بوجها حكي مخبايتو الجاره
حبيت اعرف مطلبا ولبيه
من شكلها مو جاي بزياره
استقبلتهابسرعة فتحت الباب
تبسمت قصدي اعرف الاسباب
حسيتها تعبانة الاعصاب
بعيونها الدمعات مدراره
بالهمس حكيت والقلب موجوع
بالكاد صوتا من الخجل مسموع
ولادي عليهم خايفة من الجوع
كيف العمل ما لقيت دباره
حاولت أجبر خاطرا المكسور
أفتح لها بالعتم طاقة نور
جارك اذا بيساعدك مشكور
النا عمر جيران بالحاره
زوجي رحل باصعب الاحوال
لا رزق عنا لا أرض لا مال
راح وترك بالبيت خمس طفال
وامو معي بالدار ختياره
حسيت ضاقت هل دني فيي
دمع الحزن تسمر بعينيي
القدم حياتو للفدا هديي
للأجيال رح يبقى المناره
اليتامى ربنا فيهم توصا
عطاهم بجنة الرضوان حصا
عوض مايشعرو بحرقة وغصا
لازم يلبسو تاج الاماره
ارشيف ابو لطفي وسوف
تعليقات
إرسال تعليق