اضحى مبارك:محكية للشاعر السوري سليمان ابو لطفي وسوف
اضحى مبارك على الجميع
ما بعرف شو بدي قول
من عيد الاضحى مخجول
كنا نضحي بعيد النحر
خواريف ندبح وعجول
كنا الاضحى نستنا
بأكل اللحمة نتهنا
والدبكة تحبك عنا
رقص وبسط ودق طبول
كنا ننطر يوم العيد
نفرح نلبس توب جديد
غناني وبهجة وزغاريد
وكل واحد فاتح منزول
كيف انقلبت فينا الحال
عيشتنا فقر. واذلال
صاروا قلال المعهم مال
مو عايش غير المسؤل
الله يساعدنا ويعين
تعتر هالشعب المسكين
لا سمنة عنا ولا طحين
لا في ضيافةولا معمول
يا الله شو هالضيقا
تعبنا ما عاد نطيقا
غدا وعشا وترويقا
مرة حمص مرة فول
حالتنا صارت صعبي
مثل العايش بالغربي
ترأف فينا يا ربي
ماحلا هل ازمة تزول
٢٠٢١/٧/٢٠
سليمان ابو لطفي وسوف
تعليقات
إرسال تعليق