رحنا ضيعان:محكية بقلم الشاعرة بشرى عباس من سوريا
#رحنا_ضيعان
شي بيجنن يا إنسان
كيف عايش وإنت كحيان
مافيك تلم المصروف
ليلية نايم غضبان
يومية في هم جديد
والحياة كلها تعقيد
بدها قلب من حديد
والقلب والله تعبان
منتمنى الرخاء يعود
والمحبة عنا تسود
مابدنا فينا حسود
وعلينا يعم الأمان
بهالعيشة اشتغل الفاكور
ولا حدا فينا مسرور
مابدنا قتل الناطور
بدنا هالجيبة مليان
مدارس مونة ومكدوس
والشباب كلو منحوس
مافيه يجيب العروس
من الفقر هوي طفران
وهيدا اللي خلّص علمو
ع طول بيندب همو
قاعد لزقة على أمو
متة وأركيلة ودخان
ناس بتصرف بالملايين
ومنهن عيشتها بالدين
وناس بتدمع عليها العين
والمسؤول نايم غفيان
ياعالم شو يللي صار
عبينا من الهم جرار
بين الجنة وبين النار
رحنا بالطوفة ضيعان
#بشرى_عباس /22/8/2021/
تعليقات
إرسال تعليق