موال الكذب:محكية بقلم بشرى عباس من سوريا

 #موّال_الكذب

بيني وبينك ياأسمر

في قصّة حب

لا تخلّي الباب مسكّر

وتسدّ الدرب

بيني وبينك في قصّه

وكومة أسرار

بالقلب إلك حصّه

جنينة أزهار

لاتخلّي بقلبي غصّه

وعليك بغار

قطعت الحبلهِ بِنصّا

وقعنا بالجب

وقعنا بالحب وقعنا

وصار اللي صار

الكاس اللي شرينا منا

شربوها كتار

حصرم عنقودَك غَنّى

والقلب احتار

اشرب منو واتمنّى

من كاسَك غبّْ

يارفيق الدرب الحلوهِ

وكل الايام

حطيت بقلبي بلوهِ

ومابقدر نام

بيني وبينك في فجوهِ

والله حرام

صار بدا منك صحوهِ

ترجّع هالحب

وينك يا أسمر وينك 

بيكفيك غياب

ع هجري الله يعينك

شوف ياحَبّاب

لو تحلفلي بدينك

وتبلع الكتاب

مبيّن والله ع جبينك

موّال الكذب

#بشرى_عباس /22/9/2021/