لعبة طرنيب:محكية للاستاذة بشرى عباس من سوريا
#لعبة_طرنيب
قالتلي يلّا وينك
صار دور اللعب
تسلملي إنتَ وعينَك
يلا ياحُب
الليلة لعبتنا طرنيب
وعنها انتَ مابتغيب
رح نلعب لوج الضو
بلكي هالسبعة منجيب
لعبتنا حلوه ونغشة
ومن فوق العَشره بتمشي
وشي حدا بياكل قفشه
لو احتال بنص اللعب
بلشنا لعب الطرنيب
عيوني بعينين الحبيب
اغمزلوا وهوي بيجيب
وع قَصّو ارميلو الشب
شب الكُبّا جننني
وأخدلي عقلي مني
ولما بترميه بغني
أهلا ياحبيب القلب
وياعيني على الدينار
شو بسمّي والله محتار
معي البنت والختيار
ناقصني العشرة والشب
ولما اجاني البستون
قلنا يلا رح بتهون
شريكي اللي قبالي مجنون
نيمني ع وجي طب
والزهر آه من الزهر
موتني انا من القهر
اكيدي رح آخد كسر
تغير لوني متل الضب
بالأرض رميت وراقي
غضبت وداقت خلاقي
انتزع والله مراقي
مو حلوة مني لو سب
قلتلا مَشّي ياحب
بطلتا شغلة هاللعب
قالتلي والله ماحزرت
انا وانت ع هالدرب
احترت والله حيرني
لما حبي طنشني
حللك بقى تفهمني
انو مو قصدي هاللعب
قصدي كون حدك يا حب
#بشرى_عباس /20/9/2021/
تعليقات
إرسال تعليق