اتركني لوحدي:محكية للشاعر السوري المبدع سليمان ابو لطفي وسوف
. اتركني لوحدي
اتركني لوحدي عيش مع فني
اشعر بحالي عايش بجني
مابحب اسمع وشوشات الناس
كتر اللعي والحكي جنني
مابحب اسمع وشوشات الناس
كترالحكي بيعمل وجع بالراس
الشاعربطبعو مرهف الاحساس
بتنزل دموعو لو سمع عني
اتركني لوحدي عيش بهداوي
ماقدرت جرح البلقلب داوي
خيط المحبةانقطع شو بساوي
ولفي هجرني وابتعد عني
بوعى الصبح بنزل على البستان
بشم الهوى وبنادم الريحان
عصافير معها بترقص الاغصان
بتصدح قصايد حب وتغني
بطلع من البستان ع التلي
بناجي اله الشعر وبصلي
من بعيد بسمع صوت بيقلي
قرب لعندي ليش مستني
صوت المنادي هز اعماقي
غير الصدى للصوت مابلاقي
بحكي بهداوي بسال الساقي
معقول ساكن هون شي جني
بكسدر مع الساقي على النبعه
بعد الشرب برتاح في ربعه
بتحمى الشمس وبهم بالرجعه
راضي بحياتي وهيك متهني
برجع عبيتي بيخلص المشوار
بالبال عم تتراكم الافكار
بكتب خواطر برتجل اشعار
بسقي القوافي خمر من دني
من ديواني الثاني مشي معي
سليمان ابو لطفي وسوف
تعليقات
إرسال تعليق