تذكار :محكية بقلم الشاعرة بشرى عباس من سوريا

 #تذكار

.....................

كنّا وكانو ولاد صغار

نلعب سوا حدك يا بوّابة/ي

كبرنا شويه وفتَّحوا الزرار

ويحكي معي بيكل رتابة/ي

قلّي اكتبيلي شي تذكار

قصيدة لعزفها عَلى ربابة/ ي

اكتبت القصيدة عَ ورقة الغار

وحطيتها ذكرى في كتابي

وقلت لا بد مايجي شي نهار

يفتح الكتاب ويقراها بغيابي

وصرت اغزل من الحلا أشعار

وزين بالورد شَعري وتيابي

وسجّل بذاكرتي كل هاالأسرار

بيناتنا حكايا وقصص خلّابة/ي

والخاتم بإيدي من أسوارتو بيغار

وكل فكرو خلق الي وعَ حسابي

غاب الزمان وتشلَّعوا وراق الغار

نسي حبي وهجر كل اعتابي

ولما حن و رجع عا الدار

كان الوجع عم يتلف بأعصابي

كل الوعود تغيرت بنهار

و ياويلي وعودو شو كذّابة/ي

كان الحلم نخطب و بنوَّار

نوار مرق اصفرّ الورق بالغابة/ي

ياخجلتي من ورود الدار

وشو حكيت عنّو لأهلي وأصحابي

قلتلن هالحلو شو ما بَدَا وماصار

نور عيني هوي وأعز احبابي

هيك بيترك هالقلب محتار

يعبّي عطر شوقو بخوابي

ياريت ماعرفتو ولا كتبت هالتّذكار

ولا حبّو مرق أو دق عبوابي

#بشرى_عباس /19/9/2021/