شم ولا تدوق:محكية للشاعر مازن برهان قاسم من سوريا
**- شم ولا تدوق ..........
صارت النزلة عالسوق .. عـنـوانــا شــمّ ولا تـدوق
أسـعار بترفـع الضغـط .. وبتخـلي قـلبـك مـحـروق
بـتـزيـد هـمـوم الفـقـيـر .. وعقـلو من راسو بيطير
عـا بيتو بيرجـع بكـيـر .. صدرو مطبق ومخـنـوق
على اللـيـرة بيتحـســر .. وإنجـــازاتــــا بيـتـذكّــر
وصـايـر بفيـق معـكّـر .. كل ساعة بينطر خازوق
الله يسـاعـد ربّ البيت .. عالســمنة وتـنكـة الزيت
عايش عاكلمة يـاريت .. مسـتني الأحـوال تــروق
عـم يتمـنّى مـن الـقـلّة .. يحصل عا خبزة وبصلة
صـايـر يحـلـم بالفجلة .. ويتمنى البيض المسلوق
ويتـرحّـم عالـبـطاطا .. وعـا أيـام الــفـــــــراطـة
وعـا حـيـاة البساطة .. ويبكي عا حلمو المسروق
يارب تلـطّـف فـيـنـا .. ومـن هالـحـالــة نجـيّـنــا
ارحمنا وفرجها علينا .. راح تنشف فينا العروق
تعليقات
إرسال تعليق