وين رايحه:محكية للشاعر سليمان ابو لطفي وسوف من سوريا
احد مبارك على الجميع
وين رايحه
وين رايحه ياسارقه قلبي
وين رايحه ماظل في محبي
وين رايحه والعمر عم يرحل
شو فيه سلوى ومن بالغربي
وين رايحه
لوين بدك ترحلي محتار
لمين ارضك تاركي والدار
بكرا بيفتح وردنا بأذار
بترحل ليالي العتم والكربي
وين رايحه
لوين بدك ترحلي قولي
صرلك سني بالسفر مشغولي
عشنا سوى واليوم معقولي
ماعاد شوفك قاعدي قربي
وين رايحه
وين رايحه مابريدك تروحي
يابلسمي يامداويه جروحي
ياطيور اشكي بعدها ونوحي
وخلي دموع العين منسكبي
وين رايحه
بكرا اذا بتطول فرقتنا
رح يشمتوا بنيات حارتنا
وشو بقول لشبان ضيعتنا
لما بيشوفوا الروح مكتئبي
وين رايحه
يأسان صاير والفكر متعوب
مالي جلد اصبر على المكتوب
سليمان اسمي انا مو ايوب
اعطيني صبر ايوب ياربي
٢٠٢١/١١/٢٨
سليمان ابو لطفي وسوف
تعليقات
إرسال تعليق