ياعيد:محكية للشاعر سليمان ابو لطفي وسوف من سوريا
ميلاد مجيد ينعاد عليكم بالخير
ياعيد
لوين جاي اليوم بحياتك
شو مفكر اشتقنا لطلاتك
ياعيد عنا الفرح صار بعيد
سرقوا العسل من تم نحلاتك
ماظل عنا عسل بخوابي
سرقوه منا وحوش بالغابي
ولي على حب الوطن رابي
ببحر الفقر رميوه موجاتك
كنا بلهفة ننطرك ياعيد
نستقبلك نفرح بعام جديد
واليوم زاد الهم والتنهيد
افضل اذا طولت غيباتك
ياعيد مافي عندنا ضيافي
لاحلاوة الجبنة ولا كنافي
وحدك ياربي جروحنا شافي
نحنا العبيد البين دياتك
دخلك يارب الكون ياسيد
درب الهدى سلكنا ما منحيد
افرجها عسانا بعيدك نعيد
تشفع يابن مريم بأخواتك
عنا فقير الحال المعتر
صارت حوالو سيئه اكثر
فاجر وتاجر جاي ومكشر
والقصد بدو يمص دماتك
دخلك ياربي حسن الاحوال
عنا مايبقى فاجر ومحتال
وترجع الاحوال عال العال
وتنزل علينا كب خيراتك
٢٠٢١/١٢/٢٤
سليمان ابو لطفي وسوف
تعليقات
إرسال تعليق