الموظف:محكية للشاعر سليمان ابو لطفي وسوف من سوريا
. الموظف
معتر الموظف درويش
بيقضي عمرو تقريش
بيعيش بأصعب احوال
بيدفش يومو تدفيش
الراتب ما بيكفي ايام
سمانه وخضرا بلا لحام
عا مخدة همو بينام
الازعر عامخده من ريش
بالساعه الراتب بيطير
اجرة بيتو وفواتير
مديون وضهرو بيدير
صار معود عا التطنيش
لو شفتو مارق بالسوق
مقهور وقلبو محروق
طعم اللحمه مابيدوق
بجيابو عملي مافيش
شو بدو يساوي محتار
طارت بالسوق الاسعار
رايح من همو ينهار
معتر ومهمش تهميش
مثل الي بيتو من قزاز
تايرضي العالم معتاز
لا في مازوت ولا غاز
مرتو بتسأل كيف منعيش
عايش بالقله وبا الشح
مابيسلك غير درب الصح
وكل مين عايش دح ونح
لص وعايش عا التعفيش
العيشه صعبي فقر وذل
حرمان وتعتير وقل
بيتمنى من الدنيا يفل
ولا يقبل رشوه وبخشيش
ارشيف سليمان ابو لطفي وسوف
تعليقات
إرسال تعليق