يا ضيعتي:محكية للشاعر الكبير سليمان ابو لطفي وسوف من سوريا
احد مبارك على الجميع
كثرت في الاونة الاخيرة هجرة الشباب من بلدنا نتيجة الظروف المعيشيه الصعبة بحثا عن عمل يؤمن لهم العيش الكريم وللمناسبه كتبت
ياضيعتي
شفت العتم لاطي على بوابك
وبلون اسود صابغ تيابك
بحالتك ياضيعتي شو صار
لبستي الحزن عافرقة شبابك
الكانوا بحماكي يسطعوا اقمار
جابواالفرح يرقص على عتابك
ولما عليهم قسيت الاقدار
وريح الحرب لعبت باعصابك
غير السفر مافي لهم دبار
وعن عينهم شو بيصعب غيابك
عاعيون قشعت كل بيت مزار
وجبريل نزل يزور محرابك
والورد لفك داير ومندار
وعمل القمر خلوات برحابك
من الشمس خدتي الشال والزنار
الشعار قريوا الشعر بكتابك
وخاتم ذهب وسوار اعلى عيار
لوحه فريدي ربنا جابك
ميات نبعك مقصد الزوار
اطيب من الكوثر ماء مزرابك
ترابك بتسوى حبتو قنطار
عا الذهب ناف وفاق بحسابك
كبروا الكانوا بحماكي صغار
مابينكروا فضلك ولا اتعابك
اخدوا معاهم للسفر تذكار
يحميهم من الاذى والاخطار
دخيره حوت كمشه من ترابك
٢٠٢٢/٢/٦
سليمان ابو لطفي وسوف
تعليقات
إرسال تعليق