شي بحيّر:محكية للشاعر مازن برهان قاسم من سوريا

 **- شي بحيِّر.............

كـل مــا أنـــوي أتعـقّــل II وفـيكـي بطِّــل اتغــزّل

حروفي والورقة بتحتج II وكلمـاتـي منّي بتزعـل

وقـلبـي يا نـاس محـيّر II بيـبـقــى ولاّ بـيـتـغــيّـر

كـل ما حـسـيـتو ختـير II بنظـــرة منهـا بيتحـوّل

مفكّر عمــرو بالعشـرين II يمكن خرّف هالمسكين

كـل مـا حلـفـتـلـو يمين II بقـلّلـــي لا تـتــــــأمّـل

وبين الـقـلب وكلمـاتي II ضـاعت منّي خطـواتي

ويمكـن قضّـي حـيـاتي II بـينــا وبيـنـو أتـنـقّــل

شــــو آخـرتــا هالقصـة II صـرنـا يا قلبي جرصة

قــرر واعطينـي فـرصـة II وبحـكـمـك لا تتعـجّـل

مـو ناقصنـي همّ وحب II عـيد حسـاباتك يا قلب

اللي قالتلك بعدك شب II قصـدا تحكـي وتتجمّـل

متلك تعبـان ومـوجــوع II وعيوني مليانة دموع

كل مـا فكّر بالمـوضــوع II بخـاف تجـنّ وتتبهـدل

ماعـاد تســعـفني الأيـام II وما عاد تغريني الأحلام

ارحمني يا قـلبي حـرام II وحــاجـة عـلـيِّ تتـدلّـل