صورة ودمعة:محكية للشاعر سليمان ابو لطفي وسوف من سوريا
.........صورة ودمعة...........
قاعد لوحدي والوقت سراق
فلفش دفاتر صفر منسيه
مر الزمن صارو كتير عتاق
مخبيهم من سنين ماضيه
حسيت في هاجت الاشواق
وزاد القلب للمضى حنيه
مكاتيب تشكي لوعة العشاق
بدموع ع الأوراق ممحيه
لقيت صورة ضمن هل اوراق
ضايعة من سنين مخفية
صورة صبية ثغرها براق
جدايل شقر عالكتف مرميه
عصدرها شي مزهر الدراق
وعيونها قناديل مضويه
حلوة حلاها حلا يوسف فاق
يمكن ع يوسف زادت شويه
شو هل الحلا يتمجد الخلاق
بتظن الله باعتا هديه
حنيت للماضي صرت مشتاق
يعود الزمن ويذكرا فيي
حسيت فيي ضاقت الافاق
دمع الندم تبسمر بعينيي
الله يسامح قاطع الارزاق
عليي وعليها زغزغ النيه
كان أسهل ع الشنق انساق
نار الجفا والهجر مابتنطاق
يا مين يعرف وينها هيي
من ديواني زعل الحكي
سليمان أبو لطفي وسوف
تعليقات
إرسال تعليق