اشتاقتلك الاوتار:محكية للشاعر سليمان ابو لطفي وسوف من سوريا
تحية الى روح المرحوم اخي المربي والفنان جرجس مخائيل وسوف ابو وسيم في الذكرى السابعه لرحيله
اشتاقتلك الاوتار
كانت بوابك للضيوف مشرعا
صوت الموسيقا كل عابر يسمعا
مع رحيلك رحل من عنا الفرح
ليالي الفرح غيرك مافيه يرجعا
حن الوتر عنك سأل عودك
عشرة عمر شو نام ع زنودك
كان الوتر مبسوط بوجودك
اشتاقتلك الاوتار تاتلعب معا
جوا القلب نهدات مخفيه
وصيحات وين رحلت ياخيي
عند الصبح وبكل مسويه
بسمع حجار البيت بتقلك تعا
ياصاحب الهمات والكف السخي
يابو عزم ماقلت عمرو بيرتخي
لمين بدي قول بعدك يا اخي
يطفي بقلبي نار هجرك ولعا
كنا عليك حمالنا نركي
رحت وماظل بدارنا بركي
بعادك لرب البسما بشكي
كتر البكي نشف بعيني مدمعا
يا مالك الاخلاق والذوق السليم
كنت الذكي انت المثقف والفهيم
رح تعمر الافراح بديار النعيم
بصوتك ملايكة المحبه بتجمعا
عشنا بسعاده سنين ماضينا
خلقنا بنفس البيت وربينا
بكرا انشالله بتلتقي فينا
وجنة عدن النا بوابا مشرعا
٢٠٢٢/٦/٨
سليمان ابو لطفي وسوف
تعليقات
إرسال تعليق