عن أي عيد:محكي للشاعر احمد دلول من سوريا
عن أي عيد الناس عم تحكي
وأولادنا من الجوع عم تشكي
صارت حياتي كلها ذل وجحيم
بالف ليره صارت العلكي
متل بوذا عن اللحم صايم
الفكر صاحي والقلب نايم
الله يجير من القادم
ماضل غير خازوق بالتركي
قالوا الصبر نعمه مع الايمان
والصبر مو عالجوع والحرمان
الصاري انكسر وتبهدل الربان
وصار الحجر عا حالنا بيبكي
ارفعنا الايادي بالصلا والصوم
ليفك اسر البائس المحروم
ذل وقهر والحق عا لمظلوم
تاه القطار وضاعت السكي
حفوا الشوارب وعفروا حتى اللحى
حامل بايد كتاب وبيدو مسبحى
بالعيد يدعو للملك ول ماستحى
حاجي كذب يكفي دعاء وفزلكي
ماني انا ايوب لا اصبر
ولا غور عيسى اليوم عم اسبر
صاير بكلمة دين عم اكفر
القصه قديمه وضاعت الحبكي
ربك كريم يغير الاحوال
يعود الغرح والحب للاجيال
وان كان ضلينا ع هل منوال
متل السمك مسجون بالشبكي
لارب دعواتي عم بيسمع
ولا سارق من المال رح يشبع
من دمنا كاسات عم برقع
وكاس الوطن يحلى مع الكلكي
تعليقات
إرسال تعليق