خدني عوادي النضارة:محكي للشاعرة الكبيرة فايزة معماري من سوريا

شروقية بعنوان خدني ع وادي النضارة خدني ع ارض الحلا أرض العلم والنور ارض الحضارة ال بها مفتون وجداني وادي النضارة اللي ارضو من شذى البخور وريحة عطور الحبق والفل سكراني هونيك ببقى العمر عايش متل عصفور ابرم ع كل القرى وغنيلها غناني واطلع ع اعلى جبل اركع وصلّي وزور أحلى كنيسة بأقدس اسم منصاني وسوح بمروجو الخضر قطّف ولمّ زهور واهدي جدايل شقر عالكتف غفياني واكتب قصايد غزل متزركشة بمنتور لشباب أحلى الخصايل فيه ربياني وعبّي خوابي خمر من مي نبع مسحور فوّار خلّى عقول الناس حيراني وارجع ع دير الخضر صلّي ووفّي ندور واطلب واتمنّى الهنا من رب فوقاني وعالجبل قلعة حصينة صامدة من دهور الحصن اللي بقيت على العدوان عصياني لهونيك خدني معك لفّ بحماها ودور واقرا ع خد الحجر تاريخ إنساني اتركني بوادي النضارة عايش ومسرور هوني جنان الخلد ما في لها تاني من وادي النضارة انا فايزة معماري أحييكم أصدقائي أينما كنتم