دبلت حروف الغزل:شروقي للشاعرة فايزة معماري من سوريا

شروقية بعنوان /دبلت حروف الغزل/ دبلت حروف الغزل واسودّت الكلمات عَ شفاف من كتر الأسى والقهر يبساني ونشفت خمور الخوابي من لظى النهدات وصارت كؤوس الفرح بالألم ملياني وكل يوم أقعد لوحدي ساهر النجمات احكيلها واشرح لها همّي وأحزاني والبس قميص العتم وانشق شذى النسمات بلكي بشذاها وعبيرا عطر خلاني وكلما عَ خدّي المجعّد كرجت الدمعات تمسح بإيدا الحنونة/ي دمع أجفاني تقلّي شويي تصبّري وبتقشعي الرايات قلّا انا شفت الأرض بالدم غرقاني وامشي عَ شط البحر فلفش هاك الموجات بلكي بجيوبا خبر أهلي وخلّاني الموجة/ي تروح وتجي وتضاحك الرملات شو همّها منّي انا ومن نار أشجاني سكرت باب الأماني وطاقة البسمات وقعدت فرفط وجع بصدور تعباني هيهات لاقي حدا تا اشتكي هيهات وكل الأحبة هاجروا مع كل جيراني قررت بعد التروّي احبس الغصات واطلق غضب مجنون ساكن بشريانيييي فايزة معماري من المشتاية تحياتي لكم اصدقائي