عا الماني:محكية للاستاذ محمد عزو حرفوش من سوريا
ع الماني دق الماني
كتير العيشه خرباني
بدن نترك هالبلاد
نهاجر ع بلد تاني.
هلكتني جرّة هالغاز
برسايل متل الألغاز
إذا بتوصلك إنجاز
بتصير تلعبلا جمباز
توفيرا صاير إعجاز
صارت معي بزماني.
يخرب بيتن هالتجّار
صاروا أخطر الفجّار
ظلمن جنّن الأسعار
طيرنا متل الإعصار
حطوا بنعشي مسمار
وقالوا موتك مجاني.
يامراتي ديوني كترو
من مخي طالع بذرو
ما حدا مقدّر عذرو
الحْرامي نافخ صدرو
متل لِ راكب ميكرو
وفراماتو عطلاني.
كأنو كنّا ناقصين
تجي كورونا من الصين
والأصعب هم التقنين
ب الكهربا والبنزين
نص العالم محبوسين
ومرعوب النص التاني.
تورّم مخّي من التفكير
خرم الإبرة بشوفو كبير
الوضع مجهول المصير
صاير أخطر من الخطير
الشغلة صار بدها تدبير
من عند الله الفوقاني.
وضعنا فايت بالحيط
صعب تأمّن حتى الزيت
ماعندن جنس التخطيط
كلو تخبيط بْ تخبيط
بلكي بنفطس عالسكيت
وبياخد وسام الجاني.
من بلدنا ما بنروح
وما فينا بالسر نبوح
رح نبني للهمّ صروح
يا روحي مابعدك روح
لو ملولي قلبي جروح
برجع ب ربيعي التاني.
.. محمد عزو حرفوش..
تعليقات
إرسال تعليق