لوحة الغروب او لحظة الوداع:محكية للشاعرة السوزية فايزة معماري
لوحة الغروب أو لحظة وداع
فرشت ع َ صدر الكون شعراتا
وتكيت عَ كتفو ونزلت دموعا
وسمعت الوديان نهداتا
وآهات قلبا ورجعة/ت ولوعا
ضمّا حبيبا وحلف بحياتا
إلا ع َ ضحكتها ما رح يوعا
وبوّس خدودا ولمّ دمعاتا
وقلّا عبكرا ناطر رجوعا
وحسّت متل شي كف جبارة
عم تسحبا وتبيعدا عنّو
وتضرعت بعيون محتارة
تخلّي القلوب القاسية يحنّو
وشدّت بكتفو
بس يا خسارة
هالكف اقوى منّها ومنّو
وسالت دموعا متل نهر الدم
واصفرّ لون خدودها من القهر
قالت حبيبي عالوعد رح تم
وحياة عينك والزنود السمر
لا تخاف لا تحزن ولا تنهم
إلا إلك مش نادرة هالعمر
إنشالله عبكرا شملنا بيلتم
انطرني حبيبي ....
حد باب الفجر
وغامت عيون الكون يادلّو
وضيّع طريق الرشد والتدبير
وما عاد ميّز سهلو من تلّو
وصار الأمور يقدّرا تقدير
وين اللي كانوا هون وين فلّوا
خلّوا الأسى والهم والتعتير
أخدوا الفرح
أخدوا الضحك كلّو
تركوا العتم
تركوا البرد والزمهرير
التفّ بعباتو وبرك بمحلّو
شارد الذهن مشتت التفكير
ورجع الصدى خلف المدا يقلّو
وحيااااااة قلبك
راجعة بكّير
أعشق منظر الغروب
تحياتي لكم أصدقائي
فايزة معماري من المشتاية
تعليقات
إرسال تعليق