ابن السبعين:محكية للشاعر السوري المتالق ابو لطفي.وسوف
.. ابن السبعين ..
لما بتوصل عالسبعين
وتشرين يدق بوابك
رح تتذكر يامسكين
بحسره ايام شبابك
بتتمنى تمحي خمسين
الماضي يرجع بحسابك
ترجع لعمر العشرين
عتقوا ورقات كتابك
بضمن دفاتر منسيين
بتنكش تيزيد عذابك
بتتمنى هل الدهر يلين
يعودوا يحبوك حبابك
يمكن صاروا مفتكرين
خرفت وضيعت صوابك
دروبك هجروها الحلوين
الكانوا بالماضي صحابك
ترافقهم عاحواش التين
تخبي وراقك بجيابك
كانوا بالحب مجانين
يجنوا ان طولت غيابك
رجع ياعمري سنيني
كبرت وقلوا محبيني
رجعني حب وانحب
علوا ارجع عشريني
بتمنى ترجعني شب
همه وقوه تعطيني
من خمرات الماضي غب
اسكر اشرب قنيني
مابريد تنيمني طب
جبيني عالي خليني
خايف اوعى لاقي الدرب
مدري لوين موديني
بخاف يقلي غراضك ضب
عايش عمرك عالهيني
ودهري يزاورني بالورب
وفكر ناوي يأذيني
خايف ينزل في ضرب
يوجعني ويبكيني
مابدي ضرب ولا حرب
بدي ترحمني يارب
وعدروب الخير اهديني
٢٠٢١/٦/٢٩
ابو لطفي وسوف
تعليقات
إرسال تعليق