خدني عوادي النضارة:شروقية للشاعرة فايزة معماري من سوريا
شروقية بعنوان خدني ع وادي النضارة
خدني ع أرض الحلا أرض العلم والنور
أرض الحضارة ال بها مفتون وجداني
وادي النضارة ال ارضو من شذى البخور
وريحة عطور الحبق والفل سكرانيي
هونيك ببقى العمر عايش متل عصفور
أبرم ع كل القرى ورندح لها غناني
وسوح بمروجو الخضر اقطف ولم زهور
واهدي جدايل شقر عالكتف سهراني
واكتب قصايد غزل ومزركشة بمنتور
لشباب أحلى الخصايل فيه ربياني
وعبي خوابي خمر من مي نبع مسحور
فوار خللى عقول الناس حيراني
واطلع ع اعلى جبل اركع وصلي وزور
أحلى كنيسة بأقدس اسم منصاني
وارجع ع دير الخضر صلي ووفي ندور
واطلب واترجى الهنا من رب فوقاني
وعالجبل قلعة حصينة صامدة من دهور
الحصن اللي بقيت على العدوان عصياني
لهونيك خدني معك لف بحماها ودور
واقرأ ع خد الحجر تاريخ إنساني
أتركني بوادي النضارة عايش ومسرور
هوني جنان الخلد ما في لها تانييييي
يسعد صباحكم أصدقائي
تعليقات
إرسال تعليق