سوريا الام:محكية للشاعر سليمان ابو لطفي وسوف من سوريا
احد مبارك على الجميع
سوريا الام
متشبث بالارض مليح
حالف عن ارضي مابزيح
مهما هبوب الريح يجن
ياجبل مايهزك ريح
بالمدفع والبارودي
بدافع عن ارض جدودي
بوقف حارس عحدودي
البيدخل بدو تصريح
صبرنا عالفقر وعالجوع
لازم نصمد مافي رجوع
بكرا بينحل الموضوع
بيرجع ديك الصبح يصيح
بسوريا مهد الاديان
شرعنا حقوق الانسان
نشرنا بالدنيا الايمان
بأسم محمد والمسيح
مهما الدهر علينا جار
وقسيت بالحكم الاقدار
سوريا بلاد الاحرار
شهادي مابدها توضيح
نحنا اعطينا الكون الحرف
وعلم النحو وعلم الصرف
تربينا وفي عنا عرف
للجوخ ما عتدنا تمسيح
السوري في عندو ناموس
اسمو مسجل بالقاموس
البدو ارض بلادو يدوس
بدو يتشرح تشريح
انشالله بكرا السلم يعم
الشمل بسوريا يلتم
ومنرجع لحضن الأم
لافي قتل ولا في دم
ولا في سرقه ولا تشبيح
٢٠٢٢/١/٢٣
سليمان ابو لطفي وسوف
تعليقات
إرسال تعليق